Mar 16 | BOJ | STEP | Ariya yori bati koboonaqa Maria Makdala qure qaji a na Maria Jems aqa ai na Salome na naŋgi qalub ŋam so aqa ya quleq tulaŋ boledamu di awaiyeb. Ŋam so aqa ya di Yesus aqa jejamuq di liyqajqa deqa awaiyeb.

Mark 16

Yesus a olo subq na tigelej

1 Ariya yori bati koboonaqa Maria Makdala qure qaji a na Maria Jems aqa ai na Salome na naŋgi qalub ŋam so aqa ya quleq tulaŋ boledamu di awaiyeb. Ŋam so aqa ya di Yesus aqa jejamuq di liyqajqa deqa awaiyeb. 2 Osib nobqolo ambru naŋgi tigelosib Yesus aqa jejamuq di liyqajqa deqa subq giloqnsib gamq dia segi segi maroqneb, “Yai na meniŋ kobaquja sub me getentejunu qaji di beltsim taqal atetgwas?” 4 Degsi maroqnsib gilsib ŋam ateb meniŋ kobaquja di waqosiq taqalq di sonaq uneb. Meniŋ di tulaŋ kobaquja. 5 Onaqa naŋgi sub meq aisib aŋgro wala bei baŋ woq di awesonaq unsib tulaŋ ulaugeteb. Aŋgro wala di aqa gara tulaŋ qat.

6 Onaqa aŋgro wala na minjrej, “Niŋgi ulaaib. E qalie, niŋgi Yesus Nasaret qaji ŋamburbasq di qameb qaji a qa ŋameqnub. A endi sosai. A subq na tigelqo. Niŋgi bosib sub miligi uniye. A ŋeioteb qaji lume agi unu. 7 Niŋgi unsibqa olo puluosib aisib Yesus aqa aŋgro qudei naŋgi Pita ombla na endegsib minjriye, ‘Yesus a subq na tigelqo. Tigelosiq niŋgi qa namoosiq Galili sawaq gilqo. Agi a nami niŋgi endegsi merŋgej, “E niŋgi qa namoosiy Galili sawaq gilqai.” Deqa niŋgi dego Galili sawaq gilsib dia a itqab.’”

8 Onaqa naŋgi qalub tulaŋ ulaugetosib are toŋtoŋnjrnaqa sub uratosib olo puluosib aieb. Aioqnsibqa gamq dia tamo uŋgasari naŋgi turoqnsib anjam bei minjrosaioqneb. Naŋgi laŋa aioqneb. Di kiyaqa? Naŋgi tulaŋ ulaugeteb deqa.

Maria Makdala qure qaji a Yesus unej

9 Ariya yori bati koboonaqa nobqolo ambru Yesus a subq na tigelej. Tigelosiqa mati Maria Makdala qure qaji aqaq di brantonaq unej. Maria agi nami Yesus na mondor uge 7-pela naŋgi aqaq dena winjretej qaji. 10 A Yesus unsiqa olo puluosi gilsiq Yesus aqa aŋgro qudei nami Yesus daurysib laqneb qaji naŋgi are tulaŋ ugeinjrnaqa akameqnabqa itnjrsiqa minjrej, “E Yesus unonum. A ŋambile unu.” Onaqa naŋgi Maria aqa anjam di qunab ugeinjrej. Naŋgi aqa anjam di poinjrosai.

Yesus aqa aŋgro aiyel naŋgi gamq dia Yesus uneb

12 Olo bati bei Yesus aqa aŋgro aiyel naŋgi nañu gam bei dauryosib gileqnabqa Yesus aqa jejamu bulyosiqa naŋgoq di brantonaq uneb. 13 Unsibqa naŋgi olo puluosib aisib Yesus aqa aŋgro qudei naŋgi minjreb, “Yesus aqa jejamu bulyosiq gagoq di brantqoqa iga unonum.” Degsi minjrnabqa naŋgi dego qunab ugeinjrej. Naŋgi anjam di poinjrosai.

Yesus a na aqa aŋgro naŋgi wau enjrej

14 Olo bati bei Yesus aqa aŋgro 11-pela naŋgi tal miligiq di awoosib iŋgi uyeqnabqa Yesus a naŋgoq di brantej. Yesus a nami subq na tigelonaqa tamo qudei naŋgi na unsib naŋgi sainjrnab qunab ugeinjrej. Naŋgo areqalo geteŋnjresoqnej. Deqa Yesus a naŋgoq di brantosiqa naŋgi ŋiriŋtnjrej. 15 Osiqa minjrej, “Niŋgi tigelosib sawa sawa kalil keretosib tamo uŋgasari kalil naŋgi ijo anjam bole minjroqnsib laqniye. 16 Tamo naŋgi e qa naŋgo areqalo siŋgilatosib yanso oqab qaji naŋgi di Qotei na oqas. Ariya tamo naŋgi e qa naŋgo areqalo siŋgilatqasai qaji naŋgi di Qotei na naŋgo une qa peginjrsim awai uge enjrqas. 17 Tamo naŋgi e qa naŋgo areqalo siŋgilatqab qaji naŋgi maŋwa gargekoba endegsib yoqnqab. Naŋgi ijo ñam na mondor uge uge winjroqnqab. Qotei na naŋgo meŋ bulyetnjroqnimqa naŋgi anjam bunuj maroqnqab. 18 Naŋgi baŋ waiysib amal uge ojoqnib dena moreŋqasai. Naŋgi ya uge uge uyoqnib dena dego moreŋqasai. Naŋgi tamo ma ti naŋgo gateq di baŋ atoqnibqa naŋgi olo boleoqnqab.”

Yesus a laŋ qureq oqej

19 Tamo Koba Yesus a na aqa aŋgro naŋgi anjam degsi minjrnaqa Qotei na laŋ qureq osi oqnaqa aqa baŋ woq di awoej. 20 Onaqa aqa aŋgro naŋgi jaraiosib sawa sawa kalil keretosib Yesus aqa anjam bole minjre minjre laqneb. Laqnabqa Tamo Koba Yesus a naŋgi koba na wauoqnsiqa maŋwa gargekoba yeqnaqa dena naŋgo anjam siŋgilaoqnej.